Marchnad Nadolig Rithiol

Mae Marchnad Dan Do Pen-y-bont ar Ogwr wedi cael cartref newydd dro dro a rhithiol y Nadolig hwn.

Ers ei hagoriad ym mis Mai 1972, mae’r farchnad hanesyddol 51 oed wedi chwarae rhan gref yn y gymuned leol, gan gynnal amrywiaeth o fasnachwyr annibynnol a theuluol, gyda rhai ohonynt wedi bod yn gysylltiedig â’r farchnad o’r cychwyn cyntaf.

Er budd diogelwch cyhoeddus, bu’n rhaid i'r farchnad gau yn ddiweddar ar ôl i arolwg gan arbenigwr a gymeradwywyd gan Lywodraeth Cymru gadarnhau bod problem bosibl gyda Choncrit Awyredig Awtoclafiedig Cyfnerth (RAAC) mewn rhannau o do neuadd y farchnad.

Rydym wedi bod yn gweithio gyda’r masnachwyr marchnad, Canolfan Siopa y Rhiw, diogelwch bwyd y Shared Regulatory Services, timau safonau masnach ac iechyd amgylcheddol, Busnes Cymru, yr Adran Gwaith a Phensiynau, a Cyngor ar Bopeth, er mwyn cefnogi masnachwyr, a’u cynorthwyo gyda dewisiadau safleoedd amgen fel:

• marchnadoedd stondinau dros dro yng Nghanolfan Siopa y Rhiw
• ail-leoli stondinau mewn unedau yng Nghanolfan Siopa y Rhiw a safleoedd eraill yng nghanol y dref.

Rydym yn falch o fod yn gweithio gyda masnachwyr ac yn cynnig y cyfle i gwsmeriaid ddysgu mwy am eu cynnyrch, a phrynu stoc ar-lein hefyd drwy ein marchnad rithiol.