Adrodd twyll

• Twyll Gostyngiadau’r Dreth Gyngor - Unigolyn sy’n hawlio Gostyngiad yn y Dreth Gyngor ond heb ddatgan ei fod yn gweithio, mewn perthynas, yn berchen ar dir neu eiddo, yn meddu ar gynilion, neu sydd yn hawlio budd-dal ar gyfer un cyfeiriad ond yn byw mewn lleoliad arall.
  
  
• Camddefnydd neu dwyll yn ymwneud â Bathodynnau Glas - Ennill bathodyn glas trwy dwyll, camddefnyddio bathodyn glas dilys, defnyddio bathodyn glas unigolyn sydd wedi marw, defnyddio bathodyn glas ffug, defnyddio bathodyn glas sydd wedi dod i ben, neu sydd wedi ei ddwyn.
  
  
• Twyll yn ymwneud â Thaliadau Uniongyrchol ar gyfer gofal / Taliadau Gofal Cymdeithasol - Pan fydd unigolyn yn derbyn taliadau gan y cyngor er mwyn gofalu amdano ef ei hun neu eraill, ond nad yw'r arian yn cael ei wario ar ofal, boed hynny y swm llawn neu’n rhannol.
  
  
• Camddefnyddio grantiau - Pan fydd grantiau yn cael eu rhoi i unigolion neu sefydliadau i gynorthwyo gyda’u gweithrediadau neu er mwyn addasu cartrefi i fodloni anghenion penodol y preswylwyr, ond nad yw’r grantiau yn cael eu defnyddio ar gyfer hynny.
  
  
• Twyll Ardrethi Busnes - Pan fydd gwybodaeth ffug neu gamarweiniol yn cael ei darparu ar bwrpas er mwyn osgoi talu ardrethi busnes neu i sicrhau ardrethi busnes is. Gallai hefyd gynnwys datgan yn anwireddus nad yw eiddo yn cael ei ddefnyddio bellach, er mwyn cymhwyso am ostyngiad ardrethi.
  
  
• Twyll Cyflenwyr/Contract - Pan fydd cyflenwyr neu gontractwyr yn darparu nwyddau neu gynhyrchion o safon is na’r disgwyl neu’n rhatach iddynt hwy eu hunain ar bwrpas, pan mae'r cyngor wedi talu am nwyddau neu gynhyrchion o safon uwch, ac yn disgwyl nwyddau neu gynhyrchion o safon uwch.
  
  
• Llwgrwobrwyaeth neu Lygredigaeth - Derbyn arian neu anrhegion, ffafrio contractwyr penodol, neu osod prisiau yn dwyllodrus. Pan fydd staff y cyngor neu Gynghorwyr yn cymryd mantais o’u hawdurdod.
  
  
• Twyll Yswiriant - Unrhyw hawliad yswiriant a wneir i’r sefydliad neu ddarparwyr yswiriant y sefydliad a brofir i fod yn ffug.
  
  
• Twyll Recriwtio - Ymgeiswyr sy’n darparu CV, hanes gwaith, cymwysterau, geirdaon, neu statws mewnfudo (h.y. hawl i weithio yn y DU) ffug, neu sy’n defnyddio hunaniaeth ffug er mwyn cuddio euogfarnau troseddol neu statws mewnfudo.

Nid yw twyll yn drosedd di-ddioddefwyr, a gall ein heffeithio ni i gyd.

• Y gost ariannol – Mewn termau ariannol, mae twyll yn costio biliynau o bunnoedd i’r wlad yn flynyddol, ac mae’n cynyddu eich Treth Incwm a’ch Treth Gyngor. Mae hefyd yn effeithio ar swm yr arian sydd gennym i’w wario ar ddarparu gwasanaethau cyhoeddus. O ganlyniad i dwyll, mae llai o arian ar gael er mwyn gwella ac uwchraddio pethau megis cyfleusterau addysgol, gofal cymdeithasol a thrafnidiaeth.
• Y gost ddynol – Mae costau eraill ynghlwm â thwyll, nad ydynt o reidrwydd yn amlwg. Er enghraifft, mae twyll sy’n ymwneud â Bathodynnau Glas yn golygu llai o fannau parcio i’r anabl, sydd wedi’u creu’n arbennig ar gyfer y rheiny sydd eu hangen, gan eu hamddifadu o’r gallu i adael eu cartref a gwneud y pethau hanfodol mewn bywyd.

• Mae gan Gyngor Bwrdeistref Sirol Pen-y-bont ar Ogwr gyfrifoldeb cyfreithiol i amddiffyn unrhyw gyllid cyhoeddus y mae’n ei weinyddu. Wrth wraidd ein henw da mae ymddygiad moesol, a gonestrwydd ac uniondeb ariannol. Gallai unrhyw achos o dwyll, llwgrwobrwyaeth, llygredigaeth, neu anonestrwydd arall effeithio enw da’r Cyngor yn ddifrifol, gan roi ei allu i gyflawni ei bolisïau a’i amcanion mewn perygl. Os credwn fod unigolyn/unigolion yn cyflawni twyll yn erbyn y cyngor, byddwn yn eu hymchwilio. Os canfyddwn dystiolaeth o unigolyn/unigolion yn cyflawni twyll, gallant gael eu herlyn drwy’r Llys Ynadon neu Lys y Goron.
• Gall Swyddog y Cyngor wynebu gweithdrefnau disgyblu yn ogystal. Gellir cyfeirio Cynghorwyr at Ombwdsmon Cyhoeddus Cymru.
• Mewn unrhyw achos, byddwn yn ceisio adfer unrhyw golled ariannol neu faterol. Dan amgylchiadau penodol, efallai y byddem hefyd yn atafaelu arian neu asedau pellach os credir eu bod yn enillion trosedd.
• Noder nad yw hi’n bosib i ni ddarparu manylion ynghylch achosion unigol o ganlyniad i Ddeddf Diogelu Data 2018 a Deddf Hawliau Dynol 1998.

• Mae Tîm Twyll Corfforaethol y cyngor yn cynnal ymchwiliadau ar gyfer atal a chanfod troseddau. Maent yn ymchwilio i honiadau o dwyll ac afreoleidd-dra, ac mae enghreifftiau i’w cael isod. Gofynnwn i chi ein helpu i atal, canfod a rhwystro twyll. Os amheuwch fod twyll yn cael ei gyflawni yn erbyn y cyngor, dylech ei adrodd yn syth.
• Mae sawl ffordd o wneud hynny’n gyfrinachol. Nid oes rhaid i chi roi eich enw, oni bai eich bod yn dymuno gwneud hynny. Gofynnwn i chi ddarparu cymaint o wybodaeth â phosib er mwyn ein cynorthwyo gyda’n hymchwiliad.

Byddwn yn edrych ar y wybodaeth y gwnaethoch ei rhoi. Os bydd digon o wybodaeth wedi’i darparu, byddwn yn ymchwilio i honiad yr unigolyn. Ni fyddwn yn eich hysbysu o ganlyniad yr ymchwiliad.

O bryd i'w gilydd, ni fydd angen gweithredu. Gall yr unigolyn fod wedi datgan newid yn ei amgylchiadau, lle nad yw hyn yn effeithio ar ei fudd-daliadau.

Os canfyddir bod yr unigolyn wedi cyflawni twyll budd-daliadau, yna byddwn yn gweithredu yn ei erbyn. Gall y gweithredu hwnnw gynnwys diddymu budd-daliadau'r unigolyn a’i erlyn yn y llys.