Cyngor Bwrdeistref Sirol Pen-y-bont ar Ogwr

Dolenni Cyflym

Cyfres o lwybrau beicio a cherdded sy’n ymestyn dros 6,500 o filltiroedd ledled y DU yw’r Rhwydwaith Beicio Cenedlaethol. Mae 9 llwybr Cenedlaethol yn ymestyn dros Gymru, Lloegr, yr Alban a Gogledd Iwerddon, gyda llwybrau cangen yn cysylltu â nhw. Cânt eu hategu gan lwybrau rhanbarthol hefyd.

Mae Llwybr Cenedlaethol 4 y Rhwydwaith yn cysylltu Llundain â Thyddewi ar arfordir gorllewinol Cymru, gyda changhennau wedi eu rhifo yn y pedwar degau. Y Llwybr Celtaidd yw’r enw a roddir ar y rhan honno o Lwybr 4 sy’n croesi de Cymru, o’r hen Bont Hafren yng Nghas-gwent, i Abergwaun ym Mharc Cenedlaethol Arfordir Penfro.

Dyma’r rhan o Lwybr 4 y Rhwydwaith sy’n croesi Cyngor Bwrdeistref Sirol Pen-y-bont ar Ogwr, o Felin Ifan Ddu yn y dwyrain i’r Pîl yn y gorllewin. Ceir nifer o Lwybrau Cymunedol o fewn y fwrdeistref sirol hefyd sy’n cysylltu â’r Rhwydwaith Cenedlaethol.

Mae mwy o wybodaeth am y Rhwydwaith Beicio Cenedlaethol ar gael gan adran Hawliau Tramwy’r cyngor trwy ddefnyddio’r manylion cyswllt isod, neu gan Sustrans.