Diogelwch ar Feiciau Modur
Pam ddylech chi ddarllen y cyngor hwn?
Mae beic modur neu sgwter yn gallu bod y ffordd gyflymaf i deithio o A i B, fel y gŵyr unrhyw un sy’n eu reidio. Mae’r profiad o’u reidio hefyd yn wefreiddiol, ac mae’r gair yn lledaenu - mae mwy a mwy o bobl yn dechrau beicio modur. Ond gan fod cymaint o draffig o gwmpas heddiw, mae’n bwysicach nag erioed i chi allu ymdopi â’r annisgwyl.
Pa un a ydych chi’n reidio i’r gwaith, yn feiciwr brwd sy’n reidio bob dydd neu’n mynd am dro ar eich beic ar ddiwrnod heulog – gofalwch nad yw’n digwydd i chi.
Sgiliau reidio
MAE’N RHAID I CHI FOD YN DDA i gadw allan o drafferth.
Os ydych chi eisoes yn dda, gwnewch eich hun yn well. Mae’r beicwyr modur gorau yn reidio’n amddiffynnol fel eu bod yn llai tebygol o gael damwain. Mae’r rhai sydd â sgiliau amddiffynnol da mewn rheolaeth, ac felly maent yn gallu ymlacio mwy wrth reidio.
Gofalwch eich bod yn gwneud y canlynol:
- Rhagweld yr hyn y bydd modurwyr yn ei wneud.
- Bod yn effro a sylwgar. Mae hyn yn bwysig pan fyddwch yn dod at gyffyrdd neu gylchfannau; a phan fydd angen i chi gadw llygad am ddefnyddwyr eraill y ffyrdd sy’n agored i niwed - plant, cerddwyr, beicwyr a marchogion.
- Teithio ar gyflymder a fydd yn eich galluogi i arafu a stopio mewn da bryd. Gall yr annisgwyl ddigwydd. Cofiwch reidio yn unol â’r amodau: arafwch os yw hi’n wlyb, yn niwlog neu’n rhewllyd.
- Lleoli eich hun yn y man gorau, sef yng nghanol y lôn fel rheol. Lleolwch eich hun ar y ffordd mewn da bryd cyn troi i’r dde neu’r chwith, gan ddangos i bobl eraill yr hyn yr ydych yn bwriadu ei wneud.
- Goddiweddyd yn ddiogel. A allwch chi weld peryglon? A oes tro yn y ffordd neu gyffordd? A allwch chi oddiweddyd heb gyflymu gormod neu droi’n sydyn?
- Cymryd cipolwg ‘achub bywyd’ dros eich ysgwydd cyn symud pan fydd angen i chi wybod ble mae gyrwyr eraill a’r hyn y maent yn ei wneud.
- Cael eich gweld. Gall gostwng y goleuadau blaen, hyd yn oed mewn golau dydd clir, eich helpu i fod yn weladwy.
Bydd gyrwyr eraill yn eich cythruddo weithiau. Ond os byddwch yn ymddwyn yn ymosodol mae’n bosibl y byddwch yn gorfod talu’r pris. Cyfrwch i 10 a llongyfarch eich hun ar eich pwyll. Waeth pa mor gryf yw’r temtasiwn, peidiwch â rasio ar ffyrdd cyhoeddus. Cadwch hynny ar gyfer y trac rasio.
Yr hyn y dylech ei wisgo
Prynwch yr offer cywir cyn i chi fynd ar eich beic modur.
Bydd angen y canlynol arnoch:
- Helmed gymeradwy sy’n ffitio’n iawn. Newidiwch yr helmed os ydych yn credu ei bod wedi’i difrodi. Gall helmed wen neu lachar helpu eraill i’ch gweld.
- Dillad da – sy’n golygu siacedi, trowsus ac esgidiau. Mae gan y rhai gorau farc CE arnynt a gallant eich atal rhag cael eich anafu os byddwch yn syrthio oddi ar y beic. Dylent fod yn fflwroleuol yn ystod y dydd ac yn adlewyrchol yn ystod y nos.
- Bydd dillad sydd hefyd yn eich amddiffyn yn gywir rhag y tywydd yn gwneud i chi deimlo’n fwy cyfforddus ac felly’n eich galluogi i ganolbwyntio mwy ar eich reidio.
Sicrhewch nad yw eich fisor yn fudr nac wedi’i grafu a chofiwch beidio â gwisgo fisor arlliwedig na gogls yn y nos.
- Last Updated: 19/02/2010
- Rate this page
- Back to top
