Cyngor Bwrdeistref Sirol Pen-y-bont ar Ogwr

Prif nod yr Adran Pobl Ifanc Heini (AYPD) yw cynyddu’r cyfleoedd i drigolion Bwrdeistref Sirol Pen-y-bont ar Ogwr gymryd rhan mewn chwaraeon a gweithgarwch corfforol. Mae ein gwaith gyda chlybiau chwaraeon, ysgolion, hyfforddwyr, gwirfoddolwyr a grwpiau cymunedol lleol yn annog mwy o bobl i gymryd rhan mewn chwaraeon.

Campau’r Ddraig – Nod Campau’r Ddraig yw rhoi’r cyfle i bawb rhwng 7 ac 11 oed gymryd rhan mewn amrywiaeth o chwaraeon. Gall clybiau Campau’r Ddraig gael eu rhedeg mewn ysgolion yn ystod yr awr ginio neu ar ôl ysgol, mewn clybiau chwaraeon lleol neu mewn cynlluniau chwarae a chanolfannau cymunedol.

5 x 60 – Mae’r enw 5 x 60 yn amlygu’r ffaith y dylech anelu at fod yn egnïol ar bum niwrnod o’r wythnos am o leiaf awr (60 munud).
Mae’r rhaglen hon wedi’i bwriadu i helpu pobl ifanc i fyw bywydau iach ac i’w rhoi ar ben ffordd tuag at ddod yn athletwyr gwych neu gael hwyl yn unig wrth fwynhau bod yn heini gyda ffrindiau!
Gall ymarfer corff rheolaidd gynnwys nifer o weithgareddau megis codi hwyl, dawnsio, pêl-fasged a phêl-droed.

Y rhaglen ysgolion iach – mae Ysgolion Iach yn brosiect sy’n ceisio annog pawb yn ein hysgolion i fod yn iachach. Nid dim ond bwyta’n iachach yw’r nod – er bod hynny’n rhan bwysig. Mae’r rhaglen hefyd yn amcanu at ddatblygu amgylchedd iach mewn ysgolion, ac mae materion megis ysmygu, addysg rhyw, camddefnyddio alcohol a chyffuriau, ofn bwlio a cham-drin corfforol i gyd yn cael sylw. Mae rhai ysgolion yn dod yn iachach trwy ennill Gwobr Genedlaethol Ysgol Iach y Llywodraeth ac mae llawer o rai eraill wedi sefydlu arferion hybu iechyd y tu allan i’r rhaglen.

Yn y parth – efallai na fydd amser chwarae byth yr un fath eto nawr bod Yn y Parth wedi cyrraedd ysgolion Pen-y-bont ar Ogwr. Mae’r rhaglen hon gan Gyngor Chwaraeon Cymru’n rhannu buarthau ysgolion yn wahanol ardaloedd, megis ardal chwaraeon, ardal gemau ac ardal ymlacio. Fel rhan o’r sesiynau daw disgyblion blwyddyn 5 a 6 yn fonitoriaid chwarae gweithredol, gan gymryd rhan mewn cwrs hyfforddi hwyliog i ddysgu gemau newydd, pleserus. Caiff disgyblion eu hannog hefyd i feddwl am eu gemau eu hunain i wneud amser chwarae’n fwy o hwyl.

Dance Xtra – mae dawns, yn enwedig dawns stryd, ymhlith y gweithgareddau sy’n tyfu gyflymaf ym Mwrdeistref Sirol Pen-y-bont ar Ogwr. Mae bron pob ysgol uwchradd bellach yn cynnig dosbarthiadau dawns ar ôl ysgol ac mae nifer o glybiau dawns cymunedol wedi datblygu. Mae Gwasanaeth Ieuenctid Pen-y-bont ar Ogwr yn parhau i drefnu dosbarthiadau a chystadlaethau sy’n arwain yn y pen draw at gyfleoedd i gymryd rhan mewn pencampwriaethau cenedlaethol. Unwaith eto bydd yr Adran Pobl Ifanc Heini’n cynnal ei digwyddiad dawns rhwng ysgolion, digwyddiad sydd wastad yn boblogaidd iawn ac yn hynod gystadleuol.

Ffocws ar y Gemau Olympaidd a Pharalympaidd – mae’r cyfnod paratoi o bedair blynedd cyn Llundain 2012 wedi dechrau a bydd yr Olympiad diwylliannol yn arwain at fuddsoddi mewn ystod o raglenni chwaraeon a chelfyddydol. Mae’r Adran Pobl Ifanc Heini’n credu y dylai gwaddol y Gemau Olympaidd achosi cynnydd yn nifer y bobl sy’n cymryd rhan mewn chwaraeon neu’n helpu i drefnu gweithgareddau chwaraeon. Bydd ystod o ddigwyddiadau arbennig yn cael eu trefnu i godi ymwybyddiaeth o ddarpar athletwyr Olympaidd a Pharalympaidd sydd â chyswllt â Bwrdeistref Sirol Pen-y-bont ar Ogwr. Bydd cyfleoedd gwych hefyd i ysgolion cynradd ac uwchradd gynnwys adnoddau addysgu a grëwyd yn arbennig mewn gweithgareddau yn yr ysgol.

Cynllun Hyfforddiant Perfformio – Mae Cyngor Bwrdeistref Sirol Pen-y-bont ar Ogwr yn awyddus i roi cymorth i’n hathletwyr talentog gyflawni eu potensial. Mae’r cynllun Hyfforddiant Perfformio neu PT yn rhoi cymorth i athletwyr sydd wedi cynrychioli eu gwlad. Mae’r cynllun yn rhoi Bridge Card am ddim i aelodau, gan eu galluogi i ddefnyddio ystafelloedd ffitrwydd, pyllau nofio a chyfleusterau chwaraeon eraill fel ffordd o ategu eu rhaglen hyfforddi. Gellir cael ffurflenni cais oddi wrth dîm yr Adran Pobl Ifanc Heini.

Hyfforddwyr chwaraeon – mae nifer o bobl ifanc wedi dangos diddordeb mewn trefnu chwaraeon a digwyddiadau ar gyfer eraill neu hyd yn oed fod yn hyfforddwyr. Efallai eu bod yn dymuno rhoi rhywbeth yn ôl i fyd chwaraeon neu ddatblygu profiad fel gwirfoddolwyr cyn mynd i’r brifysgol. Gall yr Adran Pobl Ifanc Heini helpu trwy roi iddynt yr wybodaeth y mae arnynt ei hangen ac o bosib eu cyfeirio at y cwrs hyfforddi cywir. Mae hyfforddiant arweinyddiaeth yn digwydd trwy gydol y flwyddyn ond gallwn hefyd ganfod cyrsiau arbennig ar gyfer dod yn hyfforddwyr mewn chwaraeon penodol megis pêl-droed, rygbi neu bêl-rwyd. Mae cyfleoedd rheolaidd i wirfoddolwyr roi cymorth gyda chwaraeon a gweithgareddau ar ôl ysgol. Weithiau rydym yn gallu cyfrannu at gostau’r cyrsiau hyfforddi. Yn ddiweddar cafwyd cynnydd yng nghostau’r cyrsiau addysgu hyfforddwyr yn dilyn cyflwyno’r hyn a elwir yn gymwysterau UKCC.

Chwarae egnïol – mae cyfleoedd i bobl ifanc chwarae’n bwysig iawn yn enwedig i’r bobl hynny nad ydynt yn dymuno ymuno â chlwb chwaraeon na dilyn camp arbennig. Mae chwarae â dewis rhydd yn hanfodol i ddatblygiad iach pob plentyn a pherson ifanc. Mae Chwarae Cymru’n datgan bod gan bob plentyn hawl i ddarpariaeth chwarae o ansawdd yn eu cymunedau. Mae nifer o leoedd ledled y fwrdeistref sirol sy’n ategu cyfleoedd ar gyfer chwarae egnïol.

Heini am oes – mae’r Adran Pobl Ifanc Heini am i bawb ym Mwrdeistref Sirol Pen-y-bont ar Ogwr fod yn egnïol yn gorfforol. Ni waeth beth fo’u hoedran, rydym yn credu y gall pob unigolyn fod yn ‘heini am oes’. Dydych chi byth yn rhy ifanc nac yn rhy hen i ddechrau bod yn egnïol yn gorfforol. Felly boed yn weithgareddau, chwaraeon neu ymarfer corff, rydym ni yma i’ch helpu ac i fod yn gefn i chi.

Rhaglen MEND – Mae MEND yn rhaglen hwyliog, rad ac am ddim sy’n galluogi plant i ddod yn iachach, yn fwy heini ac yn hapusach. Oes gennych chi blant rhwng 7 a 13 oed? Ydych chi’n poeni bod eu pwysau ddim yn iach? Ffoniwch ni ac ymunwch â’r rhaglen MEND. Gall y Rhaglen MEND helpu plant i fod yn iach ac yn heini mewn 10 wythnos yn unig – ac mae’n eu helpu i aros felly. Cynhelir y Rhaglen MEND ar ôl ysgol ddwywaith yr wythnos am 10 wythnos. Nifer cyfyngedig o leoedd sydd ar gael. Amcangyfrifir fod y rhain yn werth £400 ond maent yn gwbl rad ac am ddim diolch i gyllid gan Lywodraeth Cynulliad Cymru.