Clwb Adar Morgannwg

Nod Clwb Adar Morgannwg yw astudio a gwarchod bywyd adar yn Nwyrain Morgannwg, De Cymru. Mae'r aelodaeth yn amrywio o ddechreuwyr i'r rhai sy'n broffesiynol gysylltiedig â chadwraeth. Ein diddordeb cyffredin yw mwyhau adar.

Mae'r clwb yn cynnal rhaglen lawn o ddigwyddiadau, gyda chyfarfodydd dan do ar ystod eang o bynciau a chyfarfodydd awyr agored a arweinir gan rai o'n gwylwyr adar mwyaf profiadol.

Mae aelodau'r clwb yn cael newyddlen bob tri mis, sy'n rhoi'r newyddion a'r wybodaeth ddiweddaraf. Bob blwyddyn, cynhyrchwn yr Adroddiad Adar Dwyrain Morgannwg cynhwysfawr, am ddim i'n haelodau, ar statws adar yn y rhanbarth. Mae gwylwyr ledled yr ardal yn cyflwyno cofnodion gwylio. Mae'r rhain yn cael eu ffeilio ac maent yn darparu cronfa ddata werthfawr iawn. Yn ychwanegol, gweithredwn linell ffôn gwybodaeth sy'n dweud wrth aelodau beth sydd 'o gwmpas' ac mae gennym ein gwefan ein hunain, mewn partneriaeth â Chymdeithas Adareg Gwyr, sef www.glamorganbirds.org.uk Dilynwch y cyswllt i Glwb Adar Morgannwg ar y dudalen gartref. Mae gan y safle dudalen am yr adar a welwyd yn ddiweddar.

Rydym yn garfan gyfeillgar a chroesawgar - felly, beth bynnag eich gwybodaeth - os hoffech gymryd rhan yn ein gweithgareddau, cysylltwch â ni i wybod mwy.

Comisiwn Coedwigaeth

Comisiwn Coedwigaeth Cymru yr adran coedwigaeth y Cynulliad Cenedlaethol ac mae'n hybu coedwigaeth ledled y wlad. Mae coedwigoedd a choetiroedd yn cwmpasu mwy na 14 y cant o dir Cymru (dros 700,000 erw) ac mae'r Comisiwn yn rheoli'r ystad goedwig gyhoeddus - drwy ei asiantaeth, Menter Coedwigoedd.

Yn ychwanegol i gynhyrchu pren, mae'r Comisiwn yn gosod esiampl o reolaeth gynaliadwy yn ei goedwigoedd ei hun i wella cadwraeth, addysg, hamdden a buddion cymunedol. Mae'n annog perchnogion coetir eraill i wneud yr un peth, drwy grantiau, rheoleiddio, ymchwil a chyngor.

O fewn ein coedwigoedd cenedlaethol, rheolwn safleoedd o ddiddordeb gwyddonol arbennig, cynefinoedd mewn perygl a hen gofebau.

Nodau'r Comisiwn yw:
• diogelu ein coedwigoedd a choetiroedd
• estyn ardal ein coedwigoedd
• gwella gwerth economaidd ein hadnoddau coedwigoedd
• cadw a gwella bioamrywiaeth, tirlun a threftadaeth ddiwylliannol ein coedwigoedd a choetiroedd
• datblygu cyfle am hamdden o fewn coetiroedd
• cynyddu dealltwriaeth y cyhoedd a chyfraniad y gymuned mewn coedwigaeth

Cyfeillion Eglwysi Heb Gyfeillion

Sefydlwyd Cyfeillion Eglwysi Heb Gyfeillion yn 1957 gan Gymro balch o'r enw Ivor Bulmer-Thomas a bodola i achub eglwysi a chapeli o ddiddordeb hanesyddol a phensaernïol a fygythir gan waith dymchwel, adfeilio neu drosiadau amhriodol.

Rydym yn berchen neu'n prydlesu 32 eglwys wag y mae 18 ohonynt yng Nghymru. Roedd pob un ohonynt yn wynebu dymchwel neu adfeilio cyn i ymyriad y Cyfeillion.

Rydym yn sefydliad bron yn hollol wirfoddol, yn gweithio mewn partneriaeth (a rhannu swyddfa) gyda'r Gymdeithas Hen Gofebau. Rydym yn rhedeg cynllun cyd-aelodaeth gyda nhw hefyd. Yn ogystal, mae'r Cyfeillion yn ddiolchgar i bobl leol. Mae rhai ohonynt yn trefnu grwpiau o 'gyfeillion lleol' sy'n gofalu am yr adeiladau ar ein rhan ac yn gweithredu fel stiwardiaid ar gyfer penwythnosau Diwrnod Agored Treftadaeth. Rydym yn cloi rhai o'n heglwysi ond gallwch ymweld â nhw drwy drefniant a gallwn roi manylion mynediad i chi.

Croesawn ddiddordeb yn ein gwaith ac rydym yn arbennig o awyddus i feithrin cysylltiadau lleol a gwella ein heffeithiolrwydd drwy gynyddu ein haelodaeth. Mae'n hawdd ymuno â'r gymdeithas drwy gwblhau'r ffurflen gais ar gael o'r swyddfa neu o'n gwefan. Pris aelodaeth safonol yw £18 rhesymol y flwyddyn, ynghyd â phrisiau arbennig ar gyfer yr henoed a myfyrwyr.

Cyflwyno Gwybodaeth Treftadaeth

Dyma adnodd ar-lein newydd sy'n dod â phobl allweddol, cynnyrch a gwybodaeth berthnasol at ei gilydd sy'n ymwneud â chadwraeth adeiladau yn y DU - ymddiriedolaeth elusennol a grëwyd i'n galluogi i ofalu am ein treftadaeth genedlaethol yn well.

Mae cynnal, cadw ac adfer casgliad cain y Deyrnas Unedig o adeiladau cyfnod, gerddi a pharciau'n waith caled. Mae Heritage Information yn dod â phawb at ei gilydd: crefftwyr medrus, contractwyr, arbenigwyr, ymgynghorwyr, ffynonellau gwybodaeth arbenigol, cyrsiau academaidd a hyfforddiant, cynnyrch, llyfrau, newyddion a swyddi. Darpara Heritage Information - www.heritageinformation.org.uk - gyfoeth o wybodaeth: o gofrestr o ymgynghorwyr, contractwyr a chrefftwyr i restrau cynhwysfawr o gynnyrch sy'n ymwneud â chadwraeth adeiladau a chyflenwyr, cyrsiau, newyddion a digwyddiadau. Os yw'n well ganddynt, gall defnyddwyr ffonio llinell gymorth Heritage Information am yr un wybodaeth. Mae Heritage Information yn cysylltu pobl â'i gilydd, yn gwneud gwybodaeth yn hawdd i'w darganfod ac yn symleiddio'r broses o gadw, adfer a chynnal adeiladau a adeiladwyd yn dda gan ein cyndeidiau. Ein nod yw 'peri i dreftadaeth ddigwydd' drwy ddarparu gwasanaeth gwybodaeth a fydd yn arbed amser ac atal y difrod a wneir i dirlun hanesyddol y DU. Mae holl adrannau perthnasol y llywodraeth a chyrff cadwraeth yn cefnogi ein menter, gan gynnwys English Heritage, yr Adran Masnach a Diwydiant, yr Ymddiriedolaeth Genedlaethol, y Gronfa Lotri Treftadaeth, Ystad y Goron a'r Cyngor Gofalu am Eglwysi.

Cymdeithas Cadwraeth Morfilod a Dolffiniaid

Yn y dechrau. Sefydlwyd y Gymdeithas yn 1987 gan rai unigolion a oedd yn poeni am forfilod a dolffiniaid ar draws y byd. Sylweddolasant nad oedd un grwp penodol yn canolbwyntio ar y mamaliaid morol hyn a theimlasant fod angen cael grwp fel hwn. O ganlyniad, mae'r Gymdeithas yn gweithio i ddiogelu pob math o forfilod - un o'r ychydig yn y DU sy'n gwneud hynny.

NodauÕr Gymdeithas:
• Lleihau a chael gwared ar y bygythiadau parhaol i forfilod a'u cynefinoedd
• Codi ymwybyddiaeth o forfilod ac addysgu pobl am yr angen i ymdrin â'r bygythiadau i'w lles a'u goroesiad

Polisïau:
• Ymgyrchoedd a Gwyddoniaeth - gweithio i atal dal morfilod, hela masnachol, llygredd amgylcheddol y moroedd ac arferion pysgota sy'n niweidio morfilod a dolffiniaid. Mae tîm yr ymgyrch yn delio â llywodraethau, gwleidyddion ac yn cysylltu â grwpiau amgylcheddol eraill yn y DU ac ar draws y byd sy'n gweithio tuag at yr un nod
• Cadwraeth - ariannu cadwrwyr ac ymchwilwyr ar draws y byd sy'n uniongyrchol casglu gwybodaeth am forfilod a dolffiniaid a'u cynefin i'n helpu ni i'w deall a'r bygythiadau maent yn eu hwynebu. Mae'r Gymdeithas yn ariannu prosiectau maes yn y DU (Yr Alban a Gorllewin Cymru) a chyn belled â De America ac Asia

Y Gymdeithas heddiw:
• Mae wedi tyfu ac mae ganddi ryw 30 o staff llawn amser yn y DU, Yr Almaen ac UDA. Mae gennym fwy na 60,000 o gefnogwyr
• thri chynllun aelodaeth gwahanol, gallwch ymuno a siopa ar-lein
• Mae gennym wefan llawn ysbrydoliaeth â llu o wybodaeth ddefnyddiol am y Gymdeithas. Mae gennym wasanaeth diweddaru am ddim trwy ebost hefyd

Cymdeithas Cynffig

Ffurfiwyd y Gymdeithas yn 1989 ac mae ganddi oddeutu 120 aelod. Ei nodau yw annog astudiaeth hanes a hanes naturiol yr ardal. Cynhelir cyfarfodydd bob mis yn y Ganolfan Bywyd ym Mhîl. Trefnir araith ar ryw agwedd berthnasol o hanes neu hanes naturiol. Yn ychwanegol, trefnir tripiau a theithiau cerdded i sawl lleoliad o ddiddordeb.

Mae'r Gymdeithas yn cyhoeddi newyddlen sawl gwaith y flwyddyn ac, o bryd i'w gilydd, monograffau ar sawl agwedd o hanes lleol. Ar hyn o bryd, mae cloddio archeolegol yn digwydd ger safle tref ganoloesol Cynffig ac mae prosiectau hanes lleol eraill ar y gweill. Mae'r Gymdeithas yn bwrw ati i adeiladu archif o ddeunyddiau sy'n berthnasol i hanes yr ardal, sydd ar gael i aelodau gyfeirio atynt.

Mae pentref presennol Cynffig yn dyddio o'r 17eg ganrif ond mae ei gwreiddiau'n dyddio nôl i'r 12fed ganrif o leiaf pan adeiladwyd castell gerllaw gan y Normaniaid. Tyfodd tref sylweddol o gwmpas y castell a ffynnodd tan y 15fed ganrif pan achosodd y llif parhaol o dywod i'r dref gael ei gadael. Gallwch gael mwy o wybodaeth am yr ardal a'r Gymdeithas ar www.kenfigsociety.supanet.com.

Bydd aelodau o'r Gymdeithas yn falch o ateb ymholiadau rhesymol am hanes yr ardal. Anfonwch ebost at terry.robbins@virgin.net

Cymdeithas Ecolegol Prydain

Mae Cymdeithas Ecolegol Prydain yn gymdeithas ddysg, yn elusen gofrestredig ac yn gwmni a gyfyngir gan warant. Wedi ei sefydlu yn 1913 gan academyddion i hybu a meithrin yr astudiaeth o ecoleg, mae gan y Gymdeithas oddeutu 5,000 aelod ledled y byd. Ei gweithgareddau craidd yw cyhoeddi canlyniadau ymchwil ecolegol, datblygu cyfarfodydd gwyddonol a hybu ymwybyddiaeth ecolegol drwy addysg.

Amcanion y Gymdeithas:
Symud gwyddoniaeth ecoleg yn ei blaen a'i chefnogi a chyhoeddi canlyniad ymchwil, er mwyn arwain gwybodaeth ac addysg aÕr defnydd ohonynt.

Cyfloga'r Gymdeithas 4 staff llawn amser a 2 rhan-amser yn ei swyddfa yn Llundain. Yn ogystal, darperir cefnogaeth ariannol ar gyfer prifysgolion ac athrofeydd o gwmpas y Deyrnas Unedig. Ategir at waith y Gymdeithas gan ymdrechion swyddogion ac aelodau pwyllgor nad ydynt yn cael eu talu sy'n penderfynu ar bolisïau ac yn symud prosiectau yn eu blaen. Mae'r Gymdeithas yn cyhoeddi dau gylchgrawn ag enw rhyngwladol bob blwyddyn ac mae'n trefnu o leiaf dwy gynhadledd fawr y flwyddyn, yn ogystal â nifer o gyfarfodydd llai. Mae hefyd yn cychwyn ystod eang o weithgareddau i hybu'r ymwybyddiaeth o ecoleg ymysg y cyhoedd ac ar lefel datblygwyr polisi. Yn ychwanegol i ddatblygu ecoleg yn y system addysg, darpara gefnogaeth ariannol ar gyfer prosiectau ecolegol cymeradwyedig. Ariannir y Gymdeithas drwy incwm o danysgrifiadau, cyhoeddiadau a'i phortffolio buddsoddiadau.

Cymdeithas Frenhinol Penseiri yng Nghymru

Cymdeithas Frenhinol Penseiri yng Nghymru yw rhanbarth Gymreig Sefydliad Brenhinol Penseiri Prydeinig a chynrychiolia'r holl benseiri siartredig sy'n gweithio yng Nghymru. Mae aelodau RIBA yn cymryd agwedd gyfrifol at ddatblygiad cynaliadwy ac mae sawl cwmni yng Nghymru wedi arbenigo mewn datblygu dulliau dyfeisgar o gynllunio'n gynaliadwy. Cynhaliwn sesiynau hyfforddi rheolaidd ar gynlluniau ynni isel, sy'n agored i bawb.

Cred yr RSAW fod gan gynllun da fuddion amgylcheddol a chymdeithasol go iawn, ynghyd â manteision ariannol ac economaidd. Mae ein haelodau'n awyddus i ddangos bod adeiladau a gynllunnir yn dda'n edrych yn well ac yn gweithio'n well, yn para fwy ac yn gwneud cyfraniad sylweddol i ansawdd bywyd.

Gall penseiri siartredig gynghori ar brosiectau adeiladu a datblygu o bob maint a math. Hyfforddir nhw i ddehongli anghenion cleientiaid, asesu potensial safle a gosod a datblygu syniadau cynnar i gynlluniau terfynol.

Mae'r RSAW yn cynhyrchu rhestr o gwmnïau penseiri ac yn cynnig gwasanaeth ymgynghorol am ddim i'ch helpu i ddod o hyd i'r pensaer iawn i'ch prosiect chi.

Cymdeithas Fotanegol Ynysoedd Prydain

Mae Cymdeithas Fotanegol Prydain ar gyfer unrhyw un sydd â diddordeb ym mlodau a phlanhigion Prydain ac Iwerddon. Sefydlwyd y gymdeithas yn 1836 dan yr enw Cymdeithas Fotanegol Llundain. O'i dyddiau cynharaf, mae wedi croesawu aelodau proffesiynol ac amatur a hon yw'r sefydliad mwyaf a mwyaf gweithredol sy'n ymroddedig i astudio botaneg Ynysoedd Prydain.

Cynhyrcha atlasau cenedlaethol a sirol am ddosbarthiad planhigion. Mae'n cyhoeddi cylchgrawn gwyddonol, Watsonia, ac mae'n cynnal cynadleddau ar fotaneg.

Mae aelodau'n derbyn newyddlen dair gwaith y flwyddyn a gwahoddir nhw i ddefnyddio'n system o gofnodwyr sirol a chyfeirwyr cenedlaethol a all helpu i adnabod planhigion. Cynhelir cyfarfodydd maes ledled Prydain ac Iwerddon a thramor ar adegau.

Mae rhaglen addysg a gefnogir gan y Gymdeithas yn anelu at ddod â hyfforddiant botanegol o ansawdd uchel o fewn cyrraedd pawb, o fyfyrwyr Lefel A i gyrsiau datblygiad proffesiynol ac ôl-raddedig. Mae'r Gymdeithas yn elusen (rhif 212560) ac fe'i rheolir gan gyngor o aelodau etholedig.

Cymdeithas Hanes Lleol Pen-y-bont ar Ogwr a'r Cylch

Dathlodd Cymdeithas Hanes Lleol Pen-y-bont ar Ogwr a'r Cylch ei phen-blwydd yn 50 yn 2002. Mae ganddi fwy na 100 aelod ac mae o leiaf 60 yn dod i gyfarfodydd misol y Gymdeithas pan fo siaradwyr gwadd yn dod i siarad ar bwnc penodol, sydd â chysylltiad hanesyddol fel arfer.

Cynhelir y cyfarfodydd yn neuadd Ysgol Gyfun Iau Brynteg am 7pm, drydydd dydd Mercher y mis fel arfer rhwng mis Medi a mis Mawrth (ac eithrio mis Rhagfyr).

Cynhelir cinio blynyddol y Gymdeithas ym mis Ebrill ac, ym misoedd Mai, Mehefin a Gorffennaf bob blwyddyn, trefnir teithiau i leoedd o ddiddordeb hanesyddol.

Mae pob croeso i aelodau newydd a gallwch gael gwybodaeth bellach drwy gysylltu â'r swyddogion isod.

Cymdeithas Hanesyddol Cwm Llynfi

Wedi ei sefydlu yn 1979 nod y Gymdeithas yw meithrin diddordeb mewn hanes lleol a Chymru yn gyffredinol, drwy ymweliadau, trafodaethau a thrwy ddarparu cyfres o ddarlithoedd addysgol amrywiol a diddorol a gyflwynir gan awdurdodau hysbys. Tra nad yw natur yr areithiau'n colli golwg o'r nod hwn, mae cyflwyniadau yn y blynyddoedd diwethaf wedi cwmpasu amserlen gronolegol ehangach o Gymru yn yr Oes Gerrig i'r Hen Aifft, y Canoloesoedd, y Rhyfel Mawr a phynciau yn yr 20fed ganrif.
Mae gan y Gymdeithas nifer o aelodau sy'n ymchwilio i hanes lleol a gweithreda fel canolbwynt ar gyfer ymholiadau a geir o bob rhan o'r wlad a thramor hyd yn oed. Mae gan y Gymdeithas oddeutu 60-70 aelod, rhai ohonynt o'r dyddiau cynnar trwy'r Llywydd gwreiddiol, Brindley Richards, ac yn ddiweddarach, Dr Lynn Jones, dau o haneswyr mwyaf enwog yr ardal. Mae'r Gymdeithas yn cyfarfod yn Llyfrgell Sirol Maesteg nos Fawrth gyntaf y mis o fis Hydref i fis Ebrill. Mae hefyd yn cynnal cinio blynyddol a thaith haf i leoliadau dymunol â natur hanesyddol. Cyhoeddwyd dau lyfryn gan y Gymdeithas ac, ers 1996, cyhoeddir newyddlen ym mis Rhagfyr a mis Ebrill bob blwyddyn. Gallwch gael copïau o'r llyfrgell.
Yn ddiweddar, penododd y Gymdeithas Mr John Lyons, un o haneswyr arweiniol y cwm, fel ei llywydd newydd a chadeirir cyfarfodydd gan y Parch Robin Williams sydd wedi dal y swydd ers sawl blwyddyn. Aelodau eraill y pwyllgor yw'r Is-Gadeirydd Theresa Murphy, y Trysorydd Mair Dart, yr Ysgrifennydd Bill Howells, Cyril Phillips, Margaret Goldsworthy a Barrie Evans. Mae croeso bob amser i aelodau newydd a gallwch gael gwybodaeth bellach gan yr ysgrifennydd.

Cymdeithas y Mamaliaid

Datganiad cennad Cymdeithas y Mamaliaid
Mae Cymdeithas y Mamaliaid yn gweithio i ddiogelu mamaliaid Prydain, atal dirywiad rhywogaethau dan fygythiad a chynghori ar yr holl faterion sy'n effeithio ar famaliaid Prydain. Astudiwn famaliaid, nodwn y problemau maent yn eu hwynebu a hybwn gadwraeth a pholisïau eraill sy'n seiliedig ar wyddoniaeth gadarn.

Yn benodol, mae Cymdeithas y Mamaliaid yn ceisio:
• codi ymwybyddiaeth o famaliaid, eu hecoleg a'u hanghenion cadwraeth
• arolygu mamaliaid Prydain a'u cynefin a nodi'r bygythiadau sy'n eu hwynebu
• cefnogi astudiaethau mamaliaid yn y DU a thramor
• cefnogi cynlluniau cadwraeth sy'n seiliedig ar wyddoniaeth gadarn
• darparu gwybodaeth gyfredol ar famaliaid drwy ein cyhoeddiadau
• cynnwys pobl o bob oed yn ein hymdrechion i ddiogelu mamaliaid
• monitro newidiadau mewn poblogaethau mamaliaid

Sut allwn helpu
• Ar gyfer ymholiadau cyffredinol, gall y cyhoedd gysylltu â'r Gwasanaeth Ymholi.
• Mae gwybodaeth ar famaliaid Prydain ar gael ar ffurf taflenni ffeithiau a chyhoeddiadau eraill. Mae'r taflenni ar ein gwefan.
• Gallwn ddarparu manylion cyswllt ar gyfer grwpiau lleol ac ymchwil a wneir ar wahanol famaliaid ledled y wlad.

Ar gyfer pobl sydd â diddordeb mewn adnabod mamaliaid Prydain, eu synau, eu holion, ayb, gall ein prosiect 'Chwilio am Famaliaid' helpu. Am fwy o fanylion, ffoniwch swyddfa'r Gymdeithas.

Cymdeithas y Cerddwyr

Cymdeithas y Cerddwyr yw sefydliad mwayf Prydain yn gweithio ar ran cerddwyr, elusen gofrestredig sydd wedi gweithio ers mwy na 65 blynedd i - ddiogelu rwydwaith unigryw Prydain o lwybrau cyhoeddus - yn rhy aml, maent wedi eu rhwystro'n anghyfreithlon ac â gormod o dyfiant. Gweithiwn gydag awdurdodau lleol i'w wneud yn bleser cerdded ar eu hyd.
- darparwn wybodaeth i'ch helpu i gynllunio eich taith a'i mwynhau'n ddiogel. Mae ein gwasanaeth gwybodaeth am ddim ac ar gael i bawb drwy gyhoediadau, ymholiadau personol a gwefan llawn cysylltiadau.
- cynyddwn fynediad i gerddwyr - mae ein gwaith yn helpu i sefydlu hawliau mynediad statudol i'n cefn gwlad.
- Diogelwn gefn gwlad rhag ddatblygiadau salw a llygredig fel bod cerddwyr yn gallu mwynhau ei lonyddwch a'i brydferthwch. Hybwn gludiant cynaliadwy a chynghorwn ar wasanaethau cludiant cyhoeddus i gerddwyr.
- Addysgwn y cyhoedd o'u hawliau a chyfrifoldebau a buddion iechyd ac amgylcheddol cerdded fel bod pawb yn mwynhau ein treftadaeth wych. Mae gennym fwy na 140,000 aelod ledled Lloegr, Yr Alban a Chymru a rhwydwaith o 450 o grwpiau cerdded lleol. Dibynnwn ar danysgrifiadau i'n cylchgrawn i ariannu ein gwaith: mae aelodau'n derbyn cylchgrawn blwyddyn llawn ffeithiau, cylchgrawn chwarterol deniadol, aelodaeth o grwp cerdded a mynediad i gannoedd o deithiau cerdded a arweinir gan arbenigwyr am ddim bob wythos a gostyngiadau mewn siopau pethau awyr agored.

Cymdeithas Ymddiriedolaethau Cadwraeth y DU

Ffurfiwyd yr Ymddiriedolaeth, sydd â 240 aelod ledled y Deyrnas Unedig, yn 1989 ar gais ei haelodau. Cynrychiola farn ymddiriedolaethau cadw adeiladau cenedlaethol, cynigia gefnogaeth a chyngor a darpara rwydwaith o wybodaeth, cyfarfodydd a chynadleddau ar draws y DU.
Mae ymddiriedolaethau cadw adeiladau'n gyrff elusennol, gwirfoddol yn aml, sy'n dod at ei gilydd i achub hen adeiladau gwag a rhoi bywyd newydd a defnydd dilys iddynt. Cyflawnir y prosiectau, sy'n cynnwys eiddo wedi eu rhestru neu sydd o fewn ardal gadwraeth yn aml, â chymorth a chyngor CYC ar bopeth o gynlluniau busnes i ffynonellau ariannu.
Rhennir CYC yn naw rhanbarth. Mae gan bob un gynrychiolydd ardal sy'n cynrychioli eu rhanbarth ar bwyllgor cenedlaethol. Trwy CYC, gall darpar ymddiriedolaethau gysylltu â'u cynrychiolydd ardal, mynd i gyfarfodydd rhanbarthol (a gynhelir ddwywaith y flwyddyn fel arfer) a chael cefnogaeth, cymorth a chyngor ymddiriedolaethau lleol eraill. Cynhelir cynhadledd flynyddol i archwilio materion perthnasol a seminarau lleol ychwanegol i roi gwybod i aelodau am newidiadau mewn deddfwriaeth a darparu fforymau i gyfnewid cyngor a syniadau.
Mae aelodaeth yn £50 y flwyddyn ac mae am ddim i ymddiriedolaethau a gafodd statws elusennol llai na deuddeng mis yn ôl. Yn y pris hwn, mae aelod yn cael copi am ddim o'r Nodiadau Cyfarwyddyd ar gyfer Ymddiriedolaethau Cadw Adeiladau (£5 fel arfer), sef y canllaw mwyaf cynhwysfawr ar gael ar sut i achub adfail a sicrhau y dychwelir ef i fywyd defnyddiol a chynhyrchiol newydd.

Cymdeithas Ymddiriedolaeth Ddinesig Porthcawl

Ffurfiwyd Cymdeithas Ymddiriedolaeth Ddinesig Porthcawl yn 1970 ac mae ganddi fwy na 650 aelod. Mae'n elusen gofrestredig ac wedi ei chofrestru gydag Ymddiriedolaeth Ddinesig Cymru. Credir mai hi yw'r gymdeithas ddinesig fwyaf yng Nghymru.

Ers iddi ffurfio, mae'r Gymdeithas wedi ymgyrchu'n ffyrnig ar nifer o faterion sy'n ymwneud â gwarchod yr arfordir, cefn gwlad ac amgylchedd adeiledig Porthcawl. Mae wedi gwneud cyfraniad positif i'r dref drwy blannu coed a gwrychoedd sydd nawr yn ffurfio nodweddion dymunol ar gylchfannau Nottage a Danygraig a mabwysiadodd Cyngor Bwrdeistref Ogwr ei gynllun ar gyfer ailadeiladu'r promenâd Esplanade. Mae'r Gymdeithas yn arolygu pob cais cynllunio ac yn ystyried y rhai hynny a fydd yn cael effaith ar gefn gwlad neu ar ansawdd weledol y treflun a'r arfordir.

Rheolir y Gymdeithas gan bwyllgor gweithredol gwirfoddol o bedwar swyddog a hyd at 16 aelod sy'n cyfarfod bob mis. Cynhelir etholiadau i'r swyddi hyn yng Nghyfarfod Cyffredinol Blynyddol y Gymdeithas.

Cyngor Archeoleg Prydain

Mae CAP Cymru'n grwp cenedlaethol Cyngor Archeoleg Prydain yn cynrychioli diddordebau'r amgylchedd hanesyddol yng Nghymru. Mae'n elusen addysgol sy'n hybu gwybodaeth, yn gwerthfawrogi ac yn gofalu am yr amgylchedd hanesyddol ar gyfer cenedlaethau nawr a'r dyfodol. Mae mwy na 500 corff treftadaeth ac oddeutu 10,000 o unigolion o bob oed yn tanysgrifio i'r sefydliad. Mae gan CAP Cymru bron i 560 aelod (unigol a chyfundrefnol, tu mewn a thu allan i Gymru). Mae ei 77 aelod cyfundrefnol yn cynrychioli cyrff cenedlaethol, rhanbarthol a lleol sy'n ymwneud â'r amgylchedd hanesyddol, yn cwmpasu cyrff statudol, proffesiynol, academaidd, amgueddfeydd a'r sector gwirfoddol. Mae ei 512 aelod unigol yn cynnwys archeolegwyr proffesiynol a di-broffesiynol ag ystod eang o ddiddordebau a phrofiad ar draws y rhychwant o amgylchedd hanesyddol, o'r oesoedd cynnar i'r cyfoes. Mae meysydd CAP Cymru'n cynnwys y fframwaith cyfreithiol a gweinyddol ar gyfer archwilio a diogelu safleoedd a thirluniau archeolegol o bob math a dyddiad, yn ogystal â nodweddion arbennig amgylchedd hanesyddol Cymru a gwell gwerthfawrogiad o archeoleg a'r amgylchedd hanesyddol ymysg y rhai sy'n byw, gweithio neu'n cymryd gwyliau yng Nghymru. Mae ysgrifenyddiaeth ac aelodaeth CAP Cymru'n barod i gynnig cyngor ar unrhyw un o'r pynciau hyn a gallwch gysylltu â nhw drwy:

Cyngor Bwrdeistref Sirol Pen-y-bont ar Ogwr

Cyfarwyddiaeth Gwasanaethau Amgylcheddol a Chynllunio

Is-Adran Cadwraeth a Pholisi Amgylcheddol

• Materion Cadwraeth, Adeiladau Hanesyddol a Rhestredig, Archeoleg - 643159
• Rheoli Cefn Gwlad, Cadwraeth Natur, Ecoleg, Bioamrywiaeth, Cynllunio Arfordirol - 643170/643160/643667
• Mynediad i Gefn Gwlad - 643182
• Agenda 21 Leol, Cynaladwyedd - 643179
• Gweithredu Prosiectau, Strategaethau Adfywio, Cynlluniau Gwelliannau Amgylcheddol, Cynlluniau Tirlun, Llwybrau Cymunedol, Treftadaeth Ddiwydiannol, Adeiladau Rhestredig ac Ardaloedd Cadwraeth - 643163/643164
• Grantiau Ardaloedd Gwella Masnachol a Diwydiannol, Grantiau Gwella Tref - 643175
• Grantiau Gwella Canol Tref Maesteg - 643669

Adran Cludiant a Pheirianneg
• Hawliau Tramwy - 642537

Adran Penseiri a Thechnegol
• Ailgylchu, Casglu a Chael Gwared ar Sbwriel - 643439

Cyfarwyddiaeth Hamdden a Gwasanaethau Cymunedol
• Parciau a Meysydd Chwarae - 642720

Cyngor Cefn Gwlad Cymru

Cyngor Cefn Gwlad Cymru (CCGC) yw ymgynghorydd statudol y llywodraeth ar gynnal prydferthwch naturiol a bywyd gwyllt a'r cyfle i fwynhau'r awyr agored yng Nghymru wledig a'i dyfroedd mewnol. Gyda'n hasiantaethau cyfatebol, English Nature a Scottish Natural Heritage, mae CCGC yn cyflawni ei gyfrifoldeb statudol ar gyfer Prydain Fawr ac yn rhyngwladol drwy'r Cyd-Bwyllgor Cadwraeth Natur.

• Mae CCGC yn helpu i gefnogi'r bobl sy'n byw ac yn rheoli cefn gwlad drwy'r gynllun amaeth-amgylcheddol Tir Gofal.

• Mae CCGC yn cynnig cyngor, gwybodaeth a chymorth ariannol. Cynhyrcha nifer o daflenni a phosteri ar faterion gwledig a bywyd gwyllt â chyhoeddiadau newydd ar gael bob blwyddyn - mae llawer ar gael o'n gwefan.